Эндиликда сувдан махсус фойдаланиш ёки сувни махсус истеъмол қилишга рухсатномани Ягона интерактив давлат хизматлари портали орқали электрон тарзда олиш мумкин.

Биламизки, сув – ҳаёт манбаи. Айниқса, буни қурғоқчил минтақада жойлашган давлатлар, жумладан, мамлакатимиз аҳолиси ҳам жуда яхши билади.

Сув – инсон ҳаёти учун зарур бўлган энг муҳим табиий ресурс. У озиқ-овқат маҳсулотларини етиштириш, энергия ва саноат маҳсулотларини ишлаб чиқариш, одамларнинг маиший ва санитар-гигиеник эҳтиёжларини қондириш каби жараёнларда тенгсиздир.

Ер шаридаги барча сув захирасининг 97,2% океанларда жамланган. Бироқ унинг таркиби ўта шўрлиги учун истеъмолга яроқсиз ҳисобланади. Сув захирасининг 2,2% эса ер юзи ва тоғликларни қоплаган музликлардаги чучук сувлар ҳиссасига тўғри келади. Шундай экан, табиатнинг ушбу қимматли ресурсини тежашимиз, асраб-авайлашимиз даркор. Бунинг учун эса назорат ва тартиб жуда муҳим.

Ҳуқуқий ҳужжатга кўра, ушбу рухсатнома сувдан махсус фойдаланиш ёки сувни махсус истеъмол қилишни, шу жумладан, сувни олишни ва оқова сувларни оқизиб юборишни амалга оширувчи жисмоний ва юридик шахсларга татбиқ қилинади.

Жисмоний шахсларнинг коммунал сув қувурлари ва канализациянинг марказлаштирилган тармоқларидан суткасига 5 м3гача сувдан умумий фойдаланишида эса татбиқ этилмайди.

Рухсатнома олмасдан сувдан махсус фойдаланиш ёки сувни махсус истеъмол қилиш тақиқланади. Авваллари бу турдаги рухсатномаларни олиш учун тегишли ташкилотларга бир қанча ҳужжатлар билан қайта-қайта мурожаат этиларди. Ҳозирги кунда электрон ҳукумат туфайли идоралараро ўзаро боғланиш ва келишиш электрон тарзда йўлга қўйилган.